AVISO FITOSANITARIO

03/09/2009

• Debido á proximidade da vendima e da recolección da froita, o presente Aviso Fitosanitario é o último que emitiremos de forma semanal durante a presente campaña. Porén, seguiremos publicando, sen unha periodicidade definida, informacións fitosanitarias e consellos prácticos que poidan axudar a mellorar o estado sanitario dos cultivos.

• Queremos agradecer aos viticultores e propietarios das parcelas da rede de seguimento que ano tras ano permitan que desenvolvamos a nosa experiencia nas súas parcelas, pois sen a súa colaboración non sería posible a emisión dos Avisos. Tamén queremos expresar o noso agradecemento aos técnicos e colaboradores que nos proporcionaron os seus datos. E por suposto, a todas as persoas que nos seguiron durante estas semanas.

VIÑA Estado fenoloxía: Maduración

Mildeu:

As manchas presentes nos gromos novos non evolucionaron e non se espera defoliación destes. Despois da vendima (en calquera momento antes da caída da folla) é aconsellable aplicar un tratamento cúprico naqueles terreos en que exista unha importante densidade de síntomas para reducir o nivel do inóculo invernante.

Botrite:

Como indicamos no aviso publicado o luns día 31, naqueles viñedos onde aínda sexa posible por non existir restricións de tempo por parte das adegas, cómpre asegurar a protección fronte a este fungo mediante a aplicación dunha funxicida antibotrítico (hai os con prazo de seguridade de 7 días e 14 días) para evitar os problemas derivados da posible instalación deste fungo na fermentación do viño. No caso de non poder xa intervir, débese asegurar no posible a correcta aireación dos acios.

Trazas:

Nesta semana as capturas de machos de Lobesia botrana reducíronse en todas as parcelas, sendo máis ben testemuñais.

Mosquito verde e outros cicadélidos:

Mantense a captura de adultos de Scaphoideus titanus nalgunhas parcelas da bisbarra do Condado, onde tamén se observou un lixeiro incremento das poboacións de Empoasca vitis.

Ácaros:

Nestes momentos, as poboacións destes artrópodos son, en xeral, reducidas ou nulas. Naquelas parcelas en que se tivese confirmado a súa presenza en campaña por enriba dos albores de tolerancia aconséllase a aplicación dun acaricida despois da vendima para reducir as formas invernantes.

MACEIRA

Moteado:

En xeral, xa non será necesaria a aplicación de ningunha funxicida antes da recolección da froita, pero é aconsellable antes da caída da folla nas variedades máis sensibles.

Cydia pomonella:

Nestes momentos da campaña a medida fitosanitaria máis aconsellable en relación a esta praga responsable do abichado das mazás é a instalación de trampas nos madeiros para capturar larvas invernantes (recordar que estas trampas deben ser destruídas en inverno). Ver Consello Fitosanitario

Pulgón Laníxero:

Polo menos na bisbarra de Pontevedra xa practicamente non se observan colonias de pulgón laníxero non parasitadas.

Araña vermella:

Debido a que nesta campaña se rexistraron fortes ataques de Panonychus ulmi nalgunhas variedades, despois de recoller a froita e antes da caída da folla aconséllase a aplicación dun acaricida para diminuír o nivel de femias que depositen ovos invernantes.

PEREIRA E MACEIRA

Monilia:

Obsérvase nalgunhas árbores froitos con presenza deste fungo que penetra por feridas de calquera natureza. Recórdase que é conveniente eliminar os froitos afectados (a igual que os caídos ao chan) para evitar danos á froita en maduración e reducir o inóculo para o ano próximo.

PLÁTANO DE SOMBRA

Corythuca ciliata:

En los árboles de las alamedas, parques, etc. de varios concellos de Galicia se observan ataques moderados de este insecto. Para su control, los insecticidas recomendados por el Ministerio son los piretroides alfa-cipermetrin y deltametrin.

CARBALLO

Altica quercetorum:

Volve observarse actividade deste defoliador en carballos de certas zonas da provincia de Ourense.

PIÑEIRO

Monochamus galloprovincialis:

Recollemos nesta semana os primeiros adultos deste insecto, vector de Bursaphelenchus xylophilus (nematodo da madeira do piñeiro, aínda non detectado en Galicia) en trampas instaladas na zona fronteiriza Pontevedra-Portugal e no municipio de Campo Lameiro.