Algúns viticultores confunden os seus síntomas cos doutras anomalías como ácaros ou problemas no crecemento causados por cambios nas condicións climáticas (cambio de calor a frío, por exemplo). Por iso é moi importante saber recoñecelos:

• na base dos pampos (a nivel dos tres primeiros entrenós) obsérvanse manchas escuras e deprimidas. Ao principio aparecen como puntos negros, pero despois vanse estendendo, conflúen, e adquiren o aspecto de "mazaduras". Cando a severidade da enfermidade é alta, a base do pampo chega a estrangularse e, ante condicións de vento, rompe.
  
  
• nas follas, sobre todo no ámbito dos nervios, e nos pecíolos, aparecen pequenos puntiños de cor marrón escura ou negra coa marxe amarela. Este é o síntoma que máis frecuentemente se confunde co debido a ácaros, aínda que son diferentes. Se a intensidade da enfermidade é elevada, a folla pode deformarse e amarelar na súa totalidade, e mesmo chega a caer.
  
  
• nos acios é difícil ver síntomas da enfermidade; de aparecer, serán manchas de cor castaña que se tornan escuras e que presentarán puntos negros (picnidios) dispostos en círculos concéntricos.
  
  
• no inverno prodúcese a manifestación máis clara da enfermidade: embranquecido da madeira agostada salpicada de numerosos puntos negros (picnidios). Tamén poden observarse os síntomas descritos para os pampos en primavera, pero neste caso en madeira agostada.