Unidade de Artrópodos
 Desenvolve
actividades que, basicamente, están enfocadas cara ós seguintes
campos de traballo:
- Diagnóstico dos insectos e
ácaros, e dos seus danos, procedentes das mostras recibidas na
Estación de particulares, servizos oficiais ou pertencentes a convenios
e a proxectos establecidos pola Estación con organismos de dentro e de
fóra de Galicia. Ademais, tamén se levan a cabo traballos de
investigación encadrados dentro daqueles proxectos ou convenios.
- Realización de prospeccións
destinadas á detección de artrópodos relevantes, moitos de
declaración obrigatoria na UE, sobre cultivos agrícolas,
forestais e ornamentais. - Realización de ensaios de campo e de
laboratorio con produtos fitosanitarios, tanto para avaliar a súa
eficacia fronte ós patóxenos e pragas como para determinar os
seus posibles efectos secundarios sobre insectos ou ácaros
útiles.
- Control biolóxico e integrado, con
traballos de campo e laboratorio destinados á optimización do
control fronte a pragas que se atopan nos cultivos e especies vexetais en xeral
máis importantes na provincia de Pontevedra. No laboratorio
efectúase a cría experimental dalgúns artrópodos
beneficiosos para seren utilizados no control dos distintos organismos que
afectan ós nosos cultivos. Unha vez que se pon a punto a técnica
pertinente no laboratorio, transfírese a tecnoloxía a empresas
privadas.
- Dentro desta unidade estanse a realizar
estudos biomecánicos ou de perigosidade do arboredo urbano mediante
análises visuais e instrumentais, o que abre unha nova vía de
traballo na Estación. Finalmente esta unidade é a encargada de
levar a cabo os seguimentos e a elaboración dos Avisos Fitosanitarios,
realizados semanalmente para informar os agricultores sobre o estado
fitosanitario dos nosos cultivos a nivel provincial.
|
