Os ventos e as precipitacións asociados á cicloxénese de onte, con rachas de ata 130-150 Km/h nalgunhas zonas da provincia de Pontevedra e choivas que acadaron os 160-177 l/m² noutras, provocaron diferentes incidencias nas árbores. Algunhas foron arrincadas de raíz pero outras sufriron rotura de ramas e rachos de diferente importancia segundo a zona afectada. As roturas e os rachos deixan exposta unha superficie de madeira irregular e/ou tocos que poden favorecer a entrada de fungos patóxenos que comprometan a vitalidade da árbore. Por este motivo será necesario actuar sobre as superficies rachadas, limpando os rachos, eliminando os tocos e protexendo a madeira con mástic cicatrizantes con funxicidas ou ben aplicando funxicidas de tipo folpet ou captan.

Tamén hai que actuar sobre as palmeiras moi afectadas polo picudo Rhynchophorus ferrugineus, pois a carga que supuxo a elevada cantidade de auga que caeu e a acción do vento farán que as palmas se desprendan con máis facilidade. Para evitar riscos persoais ou materiais é imprescindible eliminar a totalidade da coroa de palmas (medida por outra banda obrigatoria para evitar a dispersión da praga) e nunca deixar os restos acumulados, senón enterralos a profundidade, queimalos, etc.

Por outra banda, esta cicloxénese tamén provocou a caída de parte da froita de árbores como os cítricos. É necesario retirar a maior cantidade da froita que estea no solo, pois pode atraer a patóxenos oportunistas e tamén a diversas especies de moscas da froita, que este ano están a ser especialmente abundantes debido ás condicións climáticas que tivemos ata agora.